Sunday, 21 April 2019

அடுத்த இருபத்து நான்கு மணிநேரத்துக்குள்....! மைத்திரி எடுத்துள்ள முடிவு

அடுத்த இருபத்து நான்கு மணிநேரத்துக்குள்....! மைத்திரி எடுத்துள்ள முடிவு

நாட்டில் ஏற்பட்ட குண்டு வெடிப்புச் சம்பவங்கள் மற்றும் அதன் அடிப்படைகள் என்பனவற்றை கண்டறிவதற்கு அடுத்த 24 மணித்தியாலங்களுக்குள் விசேட விசாரணை சபையொன்றை அமைக்கவுள்ளதாக ஜனாதிபதி மைத்திரிபால சிறிசேன அறிவித்துள்ளார்.

இன்று இடம்பெற்ற சம்பவத்துடன் தொடர்புபட்ட விடயங்களை கண்டறிந்து, இரு வாரங்களுக்குள் இக்குழுவுக்கு அறிக்கை சமர்ப்பிக்குமாறும், இந்த சபைக்கு உயர் நீதிமன்றத்தின் நீதிபதி ஒருவரை பொறுப்பாக நியமிக்கப்பட்டுள்ளதாகவும் ஜனாதிபதி தெரிவித்துள்ளார்.

ஜனாதிபதி மைத்திரிபால சிறிசேனவினால் அடுத்த 24 மணி நேரத்துக்குள் இந்த சபை அமைக்கப்படும் எனவும் அவ்வறிவித்தலில் குறிப்பிடப்பட்டுள்ளது.
குண்டு வெடிப்பு தொடர்பில் அமைச்சர் ஹரீன் வெளியிட்ட அதிர்ச்சி தகவல் !!

குண்டு வெடிப்பு தொடர்பில் அமைச்சர் ஹரீன் வெளியிட்ட அதிர்ச்சி தகவல் !!

இந்த வெடிப்புச் சம்பவங்கள் தொடர்பில் ஏற்கனவே அறிவுறுத்தப்பட்டிருக்கையில், இவ்வாறான நிகழ்வுகள் எவ்வாறு இடம்பெற்றது என புரியாத புதிராகவுள்ளதாக அமைச்சர் ஹரீன் பெர்ணான்டோ தெரிவித்தார்.

இன்று (21) ஊடகங்களுக்குக் கருத்துத் தெரிவிக்கையில் அவர் இதனைக் கூறியுள்ளார்.

எப்படியாக இருந்தாலும் இடம்பெற்ற இச்சம்பவம் தொடர்பில் கடுமையான தீர்மானத்துக்கு வரவேண்டியுள்ளோம். உரிய முறையில் கடமையை நிறைவேற்றாதவர்களுக்கு எதிராக கடுமையான நடவடிக்கை எடுக்க வேண்டியுள்ளோம்.

இதற்கு ஒரு வாரத்துக்கு முன்னர் இந்த சம்பவம் தொடர்பில் புலனாய்வுப் பிரிவினருக்கு தகவல் கிடைத்துள்ளதாகவும், இது தொடர்பில் ஏதாவது ஒரு வழிமுறையில் பொது மக்கள் அறிவுறுத்தப்பட்டிருந்தால் இந்த பாதிப்பு நடந்திருக்க மாட்டாதெனவும் ஊடகவியலாளர் ஒருவர் அமைச்சரிடம் வினவிய போது,

தனது தந்தை 3 வாரங்களாக கொழும்பு வைத்தியசாலையொன்றில் இருந்தார். நேற்று தனக்கு தேவாலயத்துக்குச் செல்ல வேண்டாம் எனக் கூறியதாக அமைச்சர் ஹரீன் பெர்ணான்டோ தெரிவித்தார்.

புலனாய்வுத் துறையிடம் இது தொடர்பான தகவல்கள் இருந்துள்ளதாகவும், இவ்வாறிருக்கையில், இந்த சம்பவம் எப்படி நடந்தது என்பதை நினைத்துக் கூடப் பார்க்க முடியாதுள்ளதாகவும், தாங்கிக் கொள்ள முடியாத கவலையாகவுள்ளதாகவும் அமைச்சர் கூறியுள்ளார்.

இந்த நடவடிக்கையானது, தனது பொறுப்புக் குறித்து பொடுபோக்காக நடந்து கொண்டதன் ஒரு விளைவாகவே பார்க்கப்பட வேண்டியுள்ளதாகவும் அமைச்சர் மேலும் குறிப்பிட்டுள்ளார்
ஒரே பார்வையில் இலங்கையில் நடந்த தொடர் வெடிப்புச் சம்பவங்கள் - உயிரிழந்தோரின் எண்ணிக்கை 215 ஆக உயர்வு

ஒரே பார்வையில் இலங்கையில் நடந்த தொடர் வெடிப்புச் சம்பவங்கள் - உயிரிழந்தோரின் எண்ணிக்கை 215 ஆக உயர்வு

நாட்டின் பல்வேறு பகுதிகளில் இடம்பெற்ற தொடர் குண்டுவெடிப்புக்களையடுத்து நண்பகல் 12.30 வரையான காலப்பகுதியில் 215 பேர் உயிரிழந்துள்ளதுடன் 452 க்கும் மேற்பட்டோர் காயமடைந்துள்ள நிலையில் கொழும்பு தேசிய வைத்தியசாலையில் அனுமதிக்கப்பட்டுள்ளனர்.

கொழும்பு, கொச்சிக்கடை அந்தோனியார் தேவாலயம், நீர்கொழும்பு, கட்டான கட்டுவப்பிட்டிய தேவாலயம், மட்டக்களப்பு, சியோன் தேவாலயம், கொழும்பு, கிங்ஸ்பெரி ஹோட்டல், கொழும்பு, சங்கரில்ல ஹோட்டல், கொழும்பு, சினமன் கிராண்ட் கொழும்பு, தெஹிவளை ட்ரொபிகல் இன் , கொழும்பு, தெமட்டகொடை மகவில பூங்காவில் இரு வெடிப்பு மற்றும் தற்கொலை சம்பவங்கள் பதிவாகியுள்ளன.

மட்டக்களப்பில் இடம்பெற்ற சம்பவத்தில் 29 பேர் கொல்லப்பட்டுள்ளதாகவும் நீர்கொழும்பில் இடம்பெற்ற சம்பவத்தில் 111 பேர் கொல்லப்பட்டுள்ளதாகவும் கொழும்பில் இடம்பெற்ற சம்பவத்தில் இடம்பெற்ற சம்பவத்தில் 51 பேர் உயிரிழந்துள்ளதாகவும் வைத்தியசாலை வட்டாரங்கள் தெரிவிக்கின்றன. ஏனைய 13 பேர் இவ்வனர்த்தத்தில் சிக்கி உயிரிழந்துள்ளனர்.

இதேவேளை, தெமட்டகொடைப் பகுதியில் இடம்பெற்ற குண்டு வெடிப்புச் சம்பவத்தில் 3 பொலிஸார் உயிரிழந்துள்ளனர்.

இச் சம்பவத்துடன் தொடர்புடைய 7 பேரை கைதுசெய்துள்ளதாக பாதுகாப்பு இராஜாங்க அமைச்சர் ரூவான் விஜயவர்தன தெரிவித்துள்ளார்.

இந்நிலையில் 11 நாடுகளைச் சேர்ந்த 27 வெளிநாட்டவர்கள் கொல்லப்பட்டுள்ளதாக கொழும்பு தேசிய வைத்தியசாலை வட்டாரங்கள் தெரிவிக்கின்றன.

குறிப்பாக போலந்து, டென்மார்க், சீனா, ஜப்பான், பாகிஸ்தான், ஐக்கிய அமெரிக்கா, இந்தியா, மொறோக்கோ, மற்றும் பங்ளாதேஷ் ஆகிய நாடுகளைச் சேர்ந்த வெளிநாட்டவர்கள் கொல்லப்பட்டுள்ளதாக வைத்தியசாலை வட்டாரங்கள் மேலும் தெரிவிக்கின்றன.

நாட்டில் இன்று இடம்பெற்ற குண்டுவெடிப்பு மற்றும் தற்கொலைத் தாக்குதலுக்கு எந்தவித பயங்கரவாத அமைப்போ அல்லது எந்த அமைப்போ உரிமைகோரவில்லையென தெரிவிக்கப்படுகின்றது.

இதேவேளை, கொழும்பு சங்கரில்ல ஹோட்டலில் இடம்பெற்ற தற்கொலைத் தாக்குதலில் சி௪ ரக வெடிபொருட்கள் பயன்படுத்தப்பட்ட 25 கிலோகிராம் நிறையுள்ள குண்டுகள் பயன்படுத்தப்பட்டுள்ளதாக தெரிவிக்கப்படுகின்றது.

குறித்த ஹோட்டலில் இரு நபர்கள் நேற்றையதினம் (20.04. 2019) அறை இலக்கம் 616 இல் தங்கியிருந்துள்ளதாகவும் குறித்த இரு நபர்களே இவ்வாறு தற்கொலைத் தாக்குதலில் ஈடுபட்டிருக்கலாமெனவும் சந்தேகிக்கப்படுகின்றது.

தற்கொலை தாக்குதல் தாரிகளின் செயற்பாடுகள் ஹோட்டலின் உணவகப்பகுதி மற்றும் விறாந்தைப் பகுதிகளிலுள்ள சி.சி.ரி.வி. கமராக்களில் பதிவாகியுள்ளது.

வெளிநாட்டவரா அல்லது உள்ளூரைச் சேர்ந்தவர்களா ஹோட்டல் தற்கொலைத்தாக்குதலில் சம்பந்தப்பட்டுள்ளனர் என இது வரை தெரியவரவில்லை.

இந்நிலையில் நாட்டின் பாதுகாப்புக் கருதி சமூகவலைத்தளங்களின் செயற்பாடுகள் முடக்கப்பட்டுள்ளதாகவும் போலிச் செய்திகள் மற்றும் வதந்திகள் பரவுவதை தடுக்கும் நோக்கில் சமூகவலைத் தளங்களின் செயற்பாடுகுள் முடக்கப்பட்டுள்ளதாக அரசாங்கம் தெரிவிக்கின்றது.

குறிப்பாக முகப்புத்தகம், இன்ஸ்ரகிராம், வட்ஸ்அப், வைபர் போன்ற சமூக ஊடகங்களின் செயற்பாடுகள் பாதுகாப்புக் காரணங்களுக்காக முடக்கப்பட்டுள்ளன.

நாட்டில் ஏற்பட்ட தற்கொலை குண்டுத்தாக்குதல் மற்றும் வெடிப்புச் சம்பவங்களையடுத்து நாடளாவிய ரீதியில் பொலிஸ் ஊரடங்கு இன்னு மாலை 6 மணி முதல் நாளை காலை 6 மணி வரை பிறப்பிக்கப்பட்டுள்ளது.

இதேவேளை, குறிப்பாக கிறிஸ்தவர்களின் முக்கிய நாளான உயிர்ப்பு ஞாயிறு தினமான இன்று உலகிலுள்ள அனைத்து கிறிஸ்தவர்களும் உயிர்ப்பு ஞாயிறு வழிபாகளில் ஈடுபட்டிருந்த தருணம் குறித்த குண்டுத்தாக்குதல்கள் ஆலயங்களில் நடத்தப்பட்டது மிகவும் கொடூரமானதும் மிலேச்சத்தனமானதுமான செயல் என பல உலகநாடுகளும் அரசியல் தலைவர்களும் கண்டனங்களையும் கவலையையும் வெளியிட்டுள்ளனர்.

இதேவேளை பரிசுத்த பாப்ரசரும் இலங்கையில் இடம்பெற்ற குண்டுத் தாக்குதல் தொடர்பில் கவலை தெரிவித்துள்ளார்.

நாட்டிலுள்ள பாடசாலைகள் நாளை 2 ஆம் தவணைக்காக ஆரம்பமாகவுள்ள நிலையில், நாளையும் நாளை மறுதினமும் பாடசாலை விடுமுறைநாளாக கல்வி அமைச்சர் அகிலவிராஜ் காரியவசம் அறிவித்துள்ளார்.

இதேவேளை அனைத்து பொலிஸ் உத்தியோகத்தர்களின் விடுமுறைகளும் தற்காலிகமாக இரத்துச்செய்யப்பட்டுள்ளன.

நாட்டிலுள்ள பல தேவாலயங்களுக்கு ஆயுதமேந்திய பொலிஸார் மற்றும் இராணுவத்தினர் பாதுகாப்புக் கடமையிலீடுபட்டுள்ளனர்.

தாக்குதல் சம்பவங்கள் குறித்து ஜனாதிபதி, பிரதமர், எதிர்க்கட்சித் தலைவர் மற்றும் ஏனை இலங்கையின் அரசியல்வாதிகள் கண்டனங்களையும் கவலையையும் வெளியிட்டுள்னர்.

வடமாகாண சபைக்குட்பட்ட அனைத்து அரச அலுவலகங்களுக்கும் நாளை (22) விடுமுறை வழங்குமாறு வடமாகாண ஆளுநர் சுரேன் ராகவன் பணித்துள்ளார்.

நாட்டின் நிலைமை கருதி, நாடளாவிய ரீதியில் உள்ள அனைத்து பல்கலைகழகங்களினதும் கல்வி நடவடிக்கைகள் இடை நிறுத்தப்பட்டுள்ளதாகவும் அத்துடன் நாளை மற்றும் நாளை மறுதினம் நடக்கவிருந்த பல்கலைகழக பரீட்சைகள் ஒத்தி வைக்கப்பட்டுள்ளதாக தெரிவிக்கப்படுகின்றது.

நாட்டின் பாதுகாப்பு நிலைமை தொடர்பில் பாதுகாப்புத் துறை உள்ளிட்ட சகல துறைகளினதும் தலைமை அதிகாரிகளின் பங்குபற்றலில் விசேட கலந்துரையாடலொன்று இன்று இடம்பெற்றது.

இதன்போது, பொலிஸார், முப்படையினர் மற்றும் சிவில் பாதுகாப்பு திணைக்களத்தின் உத்தியோகத்தர்களை கடமையில் ஈடுபடுத்தி மத வழிபாட்டு தலங்கள், சுற்றுலா விடுதிகள், வைத்தியசாலைகள், தூதரகங்கள், கத்தோலிக்க மதகுருமார்கள், கத்தோலிக்க வணக்கஸ்தலங்கள் மற்றும் முக்கியத்துவமிக்க அரச நிறுவனங்கள் ஆகியவற்றை பாதுகாப்பதற்கான நடவடிக்கைகள் அரசினால் மேற்கொள்ளப்பட்டுள்ளன.
அடிப்படைவாத அமைப்புக்கள் அனைத்தும் தடை செய்யப்படும்- ருவன் விஜேவர்தன

அடிப்படைவாத அமைப்புக்கள் அனைத்தும் தடை செய்யப்படும்- ருவன் விஜேவர்தன

நாட்டிற்குள் காணப்படும் சகல அடிப்படைவாத அமைப்புக்களையும் அடுத்துவரும் நாட்களில் தடை செய்ய நடவடிக்கை எடுக்கப்படும் என பாதுகாப்பு இராஜாங்க அமைச்சர் ருவன் விஜேவர்தன தெரிவித்தார்.

இன்று (21) பல பகுதிகளிலும் இடம்பெற்ற வெடிப்புச் சம்பவங்கள் தொடர்பில் அறிவிக்கும் ஊடகவியலாளர் சந்திப்பில் கலந்துகொண்டு கருத்துத் தெரிவிக்கையில் அவர் இதனைக் கூறினார்.

இந்த வெடிப்புச் சம்பவங்களில் உயிரிழந்த சகலரினதும் இறுதிக் கிரியைகள் அரச செலவில் முன்னெடுக்கப்படவுள்ளதாகவும், காயமடைந்தவர்களுக்கு சிகிச்சை அளிக்கும் நடவடிக்கையை அரசாங்கம் முடிந்தவரை முன்னெடுக்கும் எனவும் அவர் குறிப்பிட்டார்.

இதுபோன்ற அவசர நிலைமைகளின் போது சகலரும் மிகுந்த அவதானத்துடன் செயற்படுமாறும் அவர் மேலும் கேட்டுக் கொண்டார்.
யாராக இருந்தாலும் தயவு தாட்சண்யம் இன்றி தண்டனை வழங்கப்படும்- பிரதமர் அதிரடி!

யாராக இருந்தாலும் தயவு தாட்சண்யம் இன்றி தண்டனை வழங்கப்படும்- பிரதமர் அதிரடி!

பலருடைய உயிர்களைக் கைப்பற்றக் காரணமாக இருந்த வெடிப்புச் சம்பவங்களுடன் சம்பந்தப்பட்டவர்கள் யாராக இருந்தாலும், தயவு தாட்சண்யம் இன்றி கைது செய்து சட்ட நடவடிக்கையை முன்னெடுக்க பாதுகாப்புப் பிரிவுக்கு அதிகாரம் வழங்கப்பட்டுள்ளதாக பிரதமர் ரணில் விக்ரமசிங்க தெரிவித்தார்.

வெடிப்புச் சம்பவம் இடம்பெற்ற தேவாலயத்துக்கு விஜயம் செய்த பிரதமர் அங்குள்ள சேதங்களைப் பார்வையிட்டதன் பின்னர் ஊடகங்களுக்குக் கருத்துத் தெரிவிக்கையில் இதனைக் கூறினார்.

இந்த நாசகார செயற்பாடுகள் நாட்டையும் நாட்டின் பொருளாதாரத்தையும் சீர்குழைக்கும் பாரிய திட்டமிட்ட நடவடிக்கைகளாகும் என நான் கருதுகின்றேன். இந்தத் தாக்குதல்களை நான் வன்மையாகக் கண்டிக்கின்றேன். சட்டத்தைப் பாதுகாப்பதற்கு நாம் அனைவரும் நடவடிக்கை மேற்கொள்ள வேண்டும்.

நாட்டில் ஏற்பட்டுள்ள இந்த பதற்ற நிலைமையில் பொறுமையாக இருந்து சமாதானத்தைப் பாதுகாக்க முயற்சிப்போம் எனவும் பிரதமர் மேலும் கேட்டுக் கொண்டார்.
மறு அறிவித்தல் வரை பல்கலைகழகங்களின் கல்வி நடவடிக்கைகள் இடை நிறுத்தம்

மறு அறிவித்தல் வரை பல்கலைகழகங்களின் கல்வி நடவடிக்கைகள் இடை நிறுத்தம்

நாடளாவிய ரீதியில் உள்ள அனைத்து பல்கலைகழகங்களினதும் கல்வி நடவடிக்கைகள்  மறு அறிவித்தல் வரை இடை நிறுத்தப்பட்டுள்ளதாக தெரிவிக்கப்படுகின்றது. நாட்டில் ஏற்பட்டுள்ள அசாதாரண சூழ்நிலையை அடுத்து இத்தீர்மானம் எடுக்கப்பட்டுள்ளது. 

அத்துடன் நாளை மற்றும் நாளை மறுதினம் நடக்கவிருந்த பல்கலைகழக பரீட்சைகள் ஒத்தி வைக்கப்பட்டுள்ளதாக தெரிவிக்கப்படுகின்றது
வெள்ளவத்தையில் சற்று முன்னர் பதற்றம்! வேன் மற்றும் பாரிய குண்டுகளுடன் சிலர் கைது!

வெள்ளவத்தையில் சற்று முன்னர் பதற்றம்! வேன் மற்றும் பாரிய குண்டுகளுடன் சிலர் கைது!

வெள்ளவத்தையில் சற்று முன்னர் பதற்ற நிலை ஏற்பட்டுள்ளதாக பொலிஸார் தெரிவித்துள்ளனர். பாரிய குண்டுகளை கொண்டு செல்லும் வானுடன் அதன் சந்தேகநபரும் கைது செய்யப்பட்டுள்ளார்.

சட்டவிரோதமான முறையில் வான் ஒன்றில் வெடிபொருட்கள் கொண்டு செல்லப்பட்டதாக பொலிஸார் தெரிவித்துள்ளனர்.

நாடு முழுவதும் பல இடங்களில் குண்டுத்தாக்குதல் இடம்பெற்று வருகிறது. அதன் தொடர்ச்சியாக வெள்ளவத்தையில் வெடிகுண்டு வெடிக்க வைக்க முயற்சி மேற்கொள்ளப்பட்டிருக்கலாம் என சந்தேகம் வெளியிடப்பட்டுள்ளது. கொழும்பின் பல பிரதேசங்களில் தாக்குதல் மேற்கொள்ளும் நோக்கில் குண்டுகள் கொண்டு செல்ல திட்டமிட்டிருந்தாக தெரிய வருகிறது.

வெள்ளவத்தை ராமகிருஷ்ணா வீதியில் வைத்து குண்டுகளுடன் வான் கண்டுபிடிக்கப்பட்டுள்ளது. வான் சாரதியே இவ்வாறு கைது செய்யப்பட்டுள்ளார். இதேவேளை வெடிபொருட்கள் களஞ்சியப்படுத்தி வைக்கப்பட்ட வீடு ஒன்று பாணந்துறை பகுதியில் கண்டுபிடிக்கப்பட்டுள்ளதாக பொலிஸார் தெரிவித்துள்ளனர்.
நீர்கொழும்பில் தற்கொலைத் தாக்குதலா..? அதி தீவீர விசாரணை ஆரம்பம்!

நீர்கொழும்பில் தற்கொலைத் தாக்குதலா..? அதி தீவீர விசாரணை ஆரம்பம்!

இன்று -21- காலை இடம்பெற்ற வெடிப்பு சம்பவங்களில் 150 க்கும் மேற்பட்டோர் உயிரிழந்திருக்கலாமென அஞ்சப்படுகிறது.  இரண்டு வெளிநாட்டவர்களும் பலியென தகவல் தெரிவிக்கின்றன.நீர்கொழும்பு கட்டுவப்பிட்டியில் இடம்பெற்ற தாக்குதல் ஒரு தற்கொலை தாக்குதலாக இருக்கலாமென நம்பப்படுகிறது.

உயிரிழந்த ஒருவரின் தலைப்பகுதியை கண்டுள்ள பொலிஸார் அதுகுறித்து தீவிர விசாரணைகளை ஆரம்பித்துள்ளனர். காயமடைந்தோருக்கு தீவிர சிகிச்சை வழங்கப்படுகிறது.

இலங்கையில் தொடர் குண்டு வெடிப்புகள் இடம்பெற்ற இடங்களின் பட்டியல்! இது வரை 8 இடங்களில் பதிவாகியுள்ளது

இலங்கையில் தொடர் குண்டு வெடிப்புகள் இடம்பெற்ற இடங்களின் பட்டியல்! இது வரை 8 இடங்களில் பதிவாகியுள்ளது

நாட்டில் இன்று காலை தொடக்கம் பல்வேறு இடங்களில் தொடர் குண்டு வெடிப்புகள் இடம்பெற்றுள்ளது.

அதில் உயிரிழந்தவர்களின் எண்ணிக்கை 207 ஆக அதிகரித்துள்ளதுடன் 400 இற்கும் மேற்பட்டோர் படுகாயமடைந்துள்ளனர்.

இது வரையில் 9 வெடிப்புச் சம்பவங்கள் இடம் பெற்றுள்ளதுடன் அவற்றில் இரண்டு வெடிப்புச் சம்பவங்கள் ஒரே இடத்தில் இடம்பெற்றுள்ளன.

இந்நிலையில் இலங்கையில் தொடர் குண்டு வெடிப்புகள் இடம்பெற்ற இடங்கள் பட்டியலிடப்பட்டுள்ளது.

  1. கொழும்பு, கொச்சிக்கடை அந்தோனியார் தேவாலயம்
  2. நீர்கொழும்பு, கட்டான கட்டுவப்பிட்டிய தேவாலயம்
  3. மட்டக்களப்பு, சியோன் தேவாலயம்
  4. கொழும்பு, கிங்ஸ்பெரி ஹோட்டல்
  5. கொழும்பு, சங்கரில்ல ஹோட்டல்
  6. கொழும்பு, சினமன் கிராண்ட்
  7. கொழும்பு, தெஹிவளை ட்ரொபிகல் இன்
  8. கொழும்பு, தெமட்டகொடை மகவில பூங்கா -1
  9. கொழும்பு, தெமட்டகொடை மகவில பூங்கா -2
இதேவேளை, குண்டு வெடிப்பு சம்பவங்களில் எந்தப் பகுதிகளில் எத்தனை பேர் இறந்தார்கள் என்ற தகவலை நாளைய தினமே வெளியிட முடியும் என பொலிஸ் ஊடகப் பேச்சாளர் தெரிவித்துள்ளார்.

இது தொடர்பான முழுயான தகவல்களை நாளைய தினத்திற்குள் அறிவிக்கப்படும் என்றும் அவர் குறிப்பிட்டார்.

கொழும்பில் சற்று முன்னர் இடம்பெற்ற செய்தியாளர் சந்திப்பின் போது ஊடகப் பேச்சாளர் ருவன் குணசேகர இந்தத் தகவலை வெளியிட்டார்.
இலங்கை குண்டு வெடிப்தைபத் தொடர்ந்து கத்தார் அமீர் இலங்கை ஜனாதிபதிக்கு இரங்கல் செய்தி!

இலங்கை குண்டு வெடிப்தைபத் தொடர்ந்து கத்தார் அமீர் இலங்கை ஜனாதிபதிக்கு இரங்கல் செய்தி!

இலங்கை ஜனாதிபதி மைத்திரிபால சிறிசேனவிற்கு கத்தார் அமீர் ஷேய்க் தமீம் பின் ஹமத் அல்-தானி தாக்குதல் தொடர்பான தனது அனுதாப அறிக்கையை அனுப்பி வைத்தார்.

இக்கொடூரமான தாக்குதல்கள் குறித்து கடுமையான கண்டனம் தெரிவித்த அவர் கத்தார் வன்முறை மற்றும் பயங்கரவாதத்தை முழுமையாக நிராகரிப்பதாகவும் குறிப்பிட்டுள்ளார். (QATAR UPDATE)
சகல பயணிகளுக்கும் சிறிலங்கன் விமான நிறுவனம் விடுத்துள்ள முக்கிய அறிவித்தல்!

சகல பயணிகளுக்கும் சிறிலங்கன் விமான நிறுவனம் விடுத்துள்ள முக்கிய அறிவித்தல்!

வெளிநாடுகளுக்கு பயணிக்கும் இலங்கைப் பயணிகள் ஊரடங்கு உத்தரவு அமுல்ப்படுத்தப்பட்ட நேரத்திலும் விமான நிலையத்திற்கு வருகைதரமுடியும் என்று சிறிலங்கன் விமான நிறுவனம் அறிவித்துள்ளது.

நாடு முழுவதும் ஊரடங்கு உத்தரவு அமுல்ப்படுத்தப்பட்டுள்ளதால் அந்த உத்தரவுக்கு மதிப்பளிக்கவேண்டும் என்று தெரிவித்துள்ள சிறிலங்கன் விமான நிறுவனம் பயணிகள் இதுதொடர்பில் சில முக்கிய விடயங்களை கவனத்திற்கொள்ளவேண்டும் என்றும் கேட்டுக்கொண்டுள்ளது.

இதன்படி விமானத்தின்வழி பயணிக்கவுள்ளோர் தமது விமானப் பயணச் சீட்டுக்கள், கடவுச் சீட்டுக்கள் ஆகியவற்றை எந்தவொரு பாதுகாப்புத் தரப்பினருக்கும் காண்பித்து விமான நிலையத்திற்கு வருகைதரமுடியும் என்று அறிவித்துள்ளது.

மேலும் சகல பயணிகளும் தமது பறப்பிற்கு முன்னதாக நான்கு மணி நேரத்திற்கு முதல் விமான நிலையத்தை வந்தடையவேண்டும் என்றும் சிறிலங்கன் விமான நிறுவனம் அறிவித்துள்ளது.

மேலதிக விடயங்கள் குறித்த தகவல்களுக்கு 094197331979 எனும் எண்ணைத் தொடர்புகொள்வதன்மூலம் தெரிந்துகொள்ளலாம் என்று விமான நிறுவனம் மேலும் கூறியுள்ளது.
குண்டு வெடிப்பு சம்பவத்தைத் தொடர்ந்து கட்டுநாயக்க விமான நிலையத்தில் பலத்த பாதுகாப்பு

குண்டு வெடிப்பு சம்பவத்தைத் தொடர்ந்து கட்டுநாயக்க விமான நிலையத்தில் பலத்த பாதுகாப்பு

கொழும்பு - கட்டுநாயக்க, பண்டாரநயாக்க சர்வதேச விமான நிலையத்தின் பாதுகாப்பு நடவடிக்கைகள் பலப்படுத்தப்பட்டுள்ளதாக விமான நிலைய அதிகாரிகள் தெரிவித்துள்ளனர்.

இன்று காலை 10 மணிமுதல் பண்டாரநாயக்க விமான நிலையத்தினுடைய பாதுகாப்பு நடவடிக்கைகள் பலப்படுத்தப்பட்டுள்ளன.

அதற்கமைவாக விமான பயணிகள் தவிற ஏனையோர் விமான நிலைய வளாகத்தினுள் அனுமதிக்கப்பட மாட்டர்கள் எனவும் விமான நிலைய பாதுகாப்பு அதிகாரிகள் தெரிவித்துள்ளனர்.

அத்துடன் விமானப் பயணங்களை மேற்கொள்கின்ற பயணிகளை உரிய காலத்திற்கு முன்னர் விமான நிலையத்திற்கு வருகை தருமாறும் விமான நிலைய அதிகாரிகள் கேட்டுக் கொண்டுள்ளனர்.

இதேவேளை, நாட்டில் இன்று காலை பல்வேறு பகுதிகளிலும் இடம்பெற்ற வெடிப்பு சம்பவங்களில் 50க்கும் மேற்பட்டவர்கள் உயிரிழந்துள்ளமை குறிப்பிடத்தக்கது.
குண்டு வெடிப்பின் பின் ஜனாதிபதி நாட்டு மக்களுக்கு விடுத்துள்ள முக்கிய அறிவிப்பு

குண்டு வெடிப்பின் பின் ஜனாதிபதி நாட்டு மக்களுக்கு விடுத்துள்ள முக்கிய அறிவிப்பு

நாட்டின் சில பகுதிகளில் பதிவாகியுள்ள குண்டு வெடிப்பு சம்பவங்களால் அசாதாரண சூழல் தோன்றியுள்ள நிலையில் மக்கள் அனைவரும் அமைதியாக இருக்க வேண்டும் என ஜனாதிபதி மைத்திரிபால சிறிசேன தெரிவித்துள்ளார்.

நாட்டின் சில பகுதிகளில் இடம்பெற்ற சம்பவங்கள் தொடர்பில் சற்று முன்னர் நாட்டு மக்களுக்கு ஆற்றிய விசேட உரையில் அவர் இதனைக் குறிப்பிட்டுள்ளார்.

இந்த குண்டு வெடிப்புச் சம்பவங்கள் பெரும் அதிர்ச்சியையும், சோகத்தையும் ஏற்படுத்தியுள்ளதாக ஜனாதிபதி தெரிவித்துள்ளார்.

இந்த சம்பவங்கள் தொடர்பிலான விசாரணைகளை மேற்கொள்வதற்கு பொலிஸார், விசேட அதிரடிப்படையினர் மற்றும் முப்படையினர் நடவடிக்கை எடுத்து வருகின்றனர்.

விசாரணைகளை முன்னெடுப்பதற்காக அரசாங்கம் சகல வழிகளிலும் நடவடிக்கை எடுத்து வருகின்றது என்பதனை அறிவித்து கொள்கின்றேன்.

இந்த சம்பவம் தொடர்பில் வெளியாகும் வதந்திகள் பொய்யான தகவல்கள் குறித்து மக்கள் அவதானத்துடன் இருக்க வேண்டுமெனவும், மக்கள் அமைதி பேண வேண்டியது மிகவம் அவசியமானது எனவும் அவர் தெரிவித்துள்ளார்.

இந்த சூழ்ச்சித் திட்டத்தின் பின்னணியில் யார் இருக்கின்றார்கள் என்பது குறித்து விசாரணை நடத்தி உரிய நடவடிக்ககைள் எடுக்கப்படும் என ஜனாதிபதி தெரிவித்துள்ளார்.

அரசாங்கம் என்ற ரீதியில் இவ்வாறான சூழ்நிலைகளில் எடுக்கப்பட வேண்டிய சகல நடவடிக்கைகளையும் எடுத்து வருவதாக அவர் குறிப்பிட்டுள்ளார்.
நாளையும், நாளை மறுமதினமும் அனைத்து பாடசாலைகளுக்கும் விடுமுறை அறிவிப்பு!

நாளையும், நாளை மறுமதினமும் அனைத்து பாடசாலைகளுக்கும் விடுமுறை அறிவிப்பு!

நாட்டில் நிலவி வரும் அசாதாரண நிலையை கருத்திற்கொண்டு நாடு பூராவும் உள்ள பாடசாலைகள் எதிர்வரும் இரண்டு நாட்களுக்கு மூடப்படவுள்ளதாக கல்வி அமைச்சு அறிவித்துள்ளது.

இதேவேளை தவணை விடுமுறை முடிந்து நாளைய தினம் பாடசாலைகள் ஆரம்பமாக இருந்தன.

இந்த சந்தர்ப்பத்தில் இலங்கையிலுள்ள பாடசாலைகள் அனைத்தும் நாளையும், நாளை மறு தினமும் மூடப்படும் என கல்வி அமைச்சர் அகில விராஜ் காரியவசம் தெரிவித்துள்ளார்.

அத்துடன் மக்களின் நலன் கருத்தியே இந்த நடவடிக்கைகள் முன்னெடுக்கப்பட்டு வருகின்றமை குறிப்பிடத்தக்கது.
இலங்கையில் ஆறு பகுதிகளில் வெடிப்பு சம்பவங்கள்! பொதுமக்களுக்கு அவசர கோரிக்கை!

இலங்கையில் ஆறு பகுதிகளில் வெடிப்பு சம்பவங்கள்! பொதுமக்களுக்கு அவசர கோரிக்கை!

இலங்கையின் ஆறு இடங்களில் வெடிப்பு சம்பவங்கள் இடம்பெற்றுள்ள நிலையில் குறித்த பகுதிகளில் மக்கள் குழுமியிருப்பதனை தவிர்க்குமாறு பொலிஸ் திணைக்களம் கோரியுள்ளது.

கொழும்பு - கொச்சிகடை, நீர்கொழும்பு மற்றும் மட்டக்களப்பு ஆகிய பகுதிகளில் அமைந்துள்ள மூன்று தேவாலயங்களில் வெடிப்புச் சம்பவங்கள் பதிவாகியுள்ளன.

அதேபோன்று ஷங்ரீ லா, கிங்ஸ்பரி மற்றும் சினமன் க்ரான்ட் ஆகிய நட்சத்திர ஹோட்டல்களிலும் வெடிப்பு சம்பவங்கள் இடம்பெற்றுள்ளதாக பொலிஸ் ஊடகப் பேச்சாளர் ருவான் குணசேகர தெரிவித்துள்ளார்.

இவ்வாறு வெடிப்பு சம்பவங்கள் இடம்பெற்ற பகுதிகளுக்கு அருகாமையில் மக்கள் சூழ்ந்திருப்பதனை தவிர்க்குமாறு அவர் கோரியுள்ளார்.

இவ்வாறு மக்கள் குழுமுவது ஆபத்தானது எனவும் விசாரணைகளுக்கு இடையூறாக அமையும் எனவும், காயமடைந்தவர்களை வைத்தியசாலைகளில் அனுமதிப்பதிலும் சிக்கல் நிலைமை ஏற்படும் எனவும் அவர் சுட்டிக்காட்டியுள்ளார்.

காயமடைந்தவர்கள் வைத்தியசாலைகளில் அனுமதிக்கப்பட்டு வருவதாகவும், வெடிப்பு சம்பவங்கள் இடம்பெற்ற பகுதிகளில் பாதுகாப்பு பலப்படுத்தப்பட்டுள்ளதாகவும் அவர் குறிப்பிட்டுள்ளார்.

சம்பவத்தில் பலர் காயமடைந்திருப்பதாகவும், உயிரிழந்தோர் பற்றிய விபரங்களை தற்போதைக்கு அதிகாரபூர்வமாக வெளியிட முடியாது எனவும் அவர் தெரிவித்துள்ளார்