Tuesday, 17 September 2019

தற்பொழுது சுற்றி வளைக்கப்படுவது எண்ணெய் வளம் கொழிக்கும் வளைகுடா அறபு நாடுகளே!

தற்பொழுது சுற்றி வளைக்கப்படுவது எண்ணெய் வளம் கொழிக்கும் வளைகுடா அறபு நாடுகளே!

அமெரிக்கா தலைமையிலான நேச நாடுகளையும், ரஷ்யா தலைமையிலான நேச நாடுகளையும் தமது நிகழ்ச்சி நிரலுக்கேற்ப நகர்த்துவதில் யூத சியோனிஸ சக்திகள் வெற்றிகண்டுள்ளன.

தற்பொழுது சுற்றி வளைக்கப்படுவது எண்ணெய் வளம் கொழிக்கும் வளைகுடா அறபு நாடுகள், நேற்றைய பகைவர்கள் இன்றைய நண்பர்கள், நேற்றைய நண்பர்கள் இன்றைய பகைவர்கள்.

பாரசீக (ஷீயா) பின்புலத்தில் சுன்னிக்களையும், (அறபு) சுன்னிக்களின் பின்புலத்தில் ஷீயாக்களையும் அழித்து பறந்து விரிந்த சியோனிஸ சாம்ராஜயத்தை நோக்கி காய்கள் நகர்த்தப் படுகின்றன.

யுக முடிவிற்கு முன்னர் இவ்வாறான சோதனைகள் இடம்பெறும் என்பதனை அல்-குர்ஆனும் சுன்னஹ்வும் உணர்த்தியுள்ளன, நிச்சயமாக இறுதி வெற்றி சத்தியத்திற்கே இருக்கும் என்பதனையும் அவை வலியுறுத்தியுள்ளன.

சோதனைகள் வரும் பொழுது ஒவ்வொரு தேசமும், சமூகமும் சோதிக்கப் படுவது போல் உம்மத்தின் ஒவ்வொரு உறுப்பினரும் அவரவர் இருக்குமிடத்தில் நேரடியாகவும் மறைமுகமாகவும் தனித்தனியாகவும் சோதிக்கப் படுகின்றோம்.

மேலைத்தேய முதாளித்துவ மேலாதிக்க சக்திகளின் நவயுக காலனித்துவ நகர்வுகளை யூதசியோனிஸ சிலுவை சக்திகளே இருபது இருபத்தோராம் நூற்றாண்டுகளில் நகர்த்திவருகின்றன.

எண்ணெய் வளமிக்க மத்திய கிழக்கும், கனிய வளங்கள் புதைந்திருக்கும் ஆபிரிக்க, மத்திய ஆசிய நாடுகளும் அவர்களின் நேரடி மறைமுக ஆக்கிரமிப்புக்களுக்கு உற்பட்டு வருகின்றன.

கடந்த நூற்றாண்டின் இறுதிப்பகுதியிலும், இந்த நூற்றாண்டின் ஆரம்பப் பகுதியிலும் அமெரிக்காவிலும் மேலை நாடுகளிலும் ஏற்பட்டு வந்த பாரிய பொருளாதார நெருக்கடி, பெட்ரோ டாலரில் ஏற்பட்ட வீக்கம் என்பன அறபு வசந்தத்துடன் முடுக்கி விடப்பட்டுள்ள ஆக்கிரமிப்புப் பணிப்போரின் மூலம் சீர் செய்யப்பட்டு வருகின்றன.

குறிப்பாக அறபுவசந்தம் அவர்களின் இலக்குகளுக்காக காவு கொள்ளப்பட்டதன் பின்னர் வட ஆபிரிக்க, மத்திய கிழக்கு, வளைகுடா நாடுகளை இலக்கு வைத்து பல்வேறு அரசியல் இராணுவ பொருளாதார மூலோபாயத் திட்டமிடல்களை அதிதீவிரமாக அவை அமுலாக்கி வருகின்றன.

அறபு தேசங்களுக்கிடையிலான வேறுபாடுகளை பூதாகரமாக்கி பாரிய இராஜதந்திர பனிப்போரை முடுக்கிவிட்டுள்ள சியோனிஸ சிலுவை மேலாதிக்க சக்திகள் அவற்றைத் துண்டாடி தமது நிகழச்சிநிரலுக்குச் சாதகமான புதிய வரைபடமொன்றை அறிமுகம் செய்கின்ற இலக்கை நோக்கி வேகமாக நகர்ந்து கொண்டிருக்கின்றன.

துரதிஷ்ட வசமாக முஸ்லிம் உம்மத்தின் மத்தியில் தொன்று தொட்டு நிலவி வரும் கிலாபத்திற்கான ஷியா சுன்னி பிரிவினை சர்ச்சைகளை யூத சியோனிஸ சிலுவை சக்திகள் தமது ஆக்கிரமிப்பு நடவடிக்கைகளுக்கு துணையாகவும், சாதகமாகவும் மூலதனமாகவும் பயன்படுத்தி மத்தியகிழக்கு நாடுகளை பிணக்காடுகளாக மாற்றிவருகின்றன.

பாரிய இராணுவ செலாவணியுடன் ஆகாய, கடல்வழி, தரைமார்க்க கூட்டு யுத்த நகர்வுகளை ஆப்கானிஸ்தான், ஈராக் போன்ற நாடுகளில் மேற்கொண்டு தோல்வி கண்ட மேற்படி சக்திகள் முஸ்லிம் உலகில் உள்ளிருந்தே தமக்கு விசுவாசமான தேசங்களையும் , ஆயுத தீவிரவாத குழுக்களையும் பரஸ்பரம் மோதவிட்டு தமது இராணுவ மூலோபாய நகர்வுகளை மேற்கொண்டு வருகின்றனர்.
(இனாமுல்லா மஸீஹுத்தீன்)
கத்தார் தூதரகத்தில் சான்றிதழ்களை அத்தாட்சிப் படுத்திக் கொள்வது தொடர்பாக புதிய அறிவுறுத்தல்கள்

கத்தார் தூதரகத்தில் சான்றிதழ்களை அத்தாட்சிப் படுத்திக் கொள்வது தொடர்பாக புதிய அறிவுறுத்தல்கள்

இலங்கையில் உள்ள கத்தார் தூதுவராலயத்தில் சான்றிதழ்களை அத்தாட்சிப் படுத்திக் கொள்வது தொடர்பாக புதிய அறிவுறுத்தல்கள்:

கடந்த காலங்களில் கத்தாரில் தொழில் புரிய விரும்புவோர் தமது கல்வி மட்டும் ஏனைய சான்றிதழ்களை இலங்கை வெளிவிவகார கொன்சுலர் பிரிவில் அத்தாட்சிப் படுத்திய பின்னர் கத்தார் தூதரகத்தில் அத்தாட்சிப் படுத்திக் கொள்வர்.

என்றாலும் அண்மைக் காலமாக கல்விச் சான்றிதழ்களைப் பொறுத்தவரையில் இலங்கை கல்வி உயர்கல்வி அமைச்சு வழங்கும் சாதாரண தர உயர்தர சான்றிதழ்கள் பலகலைக் கழக சான்றிதல்களை மாத்திரமே தூதரகம் அத்தாட்சிப் படுத்துகிறது.

வேறு அரச நிறுவனங்கள் அல்லது தனியார் கல்லூரிகள் அல்லது இங்கிருந்து பெறும் வெளிநாட்டு கல்வி உயர்கல்வி கல்விச் சான்றிதழ்களை தூதரகம் அத்தாட்சிப் படுத்துவதில்லை.

கத்தார் அரசின் அறிவுறுத்தல்களுக்கு அமையவே இந்த நடைமுறை அமுலாகிறது, இது தொடர்பாக ஏதேனும் சிக்கல்கள் இருப்பின் இலங்கை கல்வி உயர்கல்வி அமைச்சு அல்லது வெளிநாட்டு வேலை வாய்ப்பு அமைச்சு மற்றும் நிபுணர்கள் கத்தார் அரசுடன் தான் பேச்சு வார்த்தைகளை நடத்த வேண்டும்.

உதாரணமாக ஐக்கிய இராச்சியம் அவுஸ்திரேலிய, இந்திய, மலேஷியா, நியூசிலாந்து, அமேரிக்கா என பல்கலைக் கழகங்களின் சான்றிதல்களை இங்குள்ள தனியார் கல்வி நிறுவனங்களூடாக பெறுவோர்... சிரமங்களை எதிர் கொள்கின்றனர், அவற்றை அந்தந்த நாடுகளில் உள்ள கத்தார் தூதரகங்களூடாகவே உறுதிப் படுத்திக் கொள்ளுமாறு வேண்டப்படுவதால் குறிப்பிட்ட நிறுவனங்களூடாக அதற்குரிய ஒழுங்குகளை செய்து கொள்ள வேண்டும்.

அதேபோன்றே இலங்கை தொழில்நுட்ப, தொழில்பயிற்சி நிறுவனங்களின் சான்றிதழ்களும் அத்தாட்சிப் படுத்தப் படுவதில்லை.

மத்திய கிழக்கு தொழில் சந்தைக்கு ஏற்றவிதத்தில் எமது அரசும் சான்றிதழ்களை அத்தாட்சிப் படுத்திக் கொள்வதற்கு ஏற்ற வழி வகைகளை தொழில் தேடும் இளைஞர் யுவதிகளுக்கு ஏற்படுத்திக் கொடுக்க வேண்டும்!

மஸிஹுத்தீன் இனாமுல்லாஹ்

Monday, 16 September 2019

பெரும் பதட்டங்களுக்கு மத்தியில் மற்றொரு எண்ணெய் கப்பலை கைப்பற்றிய ஈரான்!

பெரும் பதட்டங்களுக்கு மத்தியில் மற்றொரு எண்ணெய் கப்பலை கைப்பற்றிய ஈரான்!

சவூதி அரேபிய எண்ணெய் ஆலை மீது நடத்தப்பட்ட ட்ரோன் தாக்குதலால் பெரும் பரபரப்பு நிலவி வரும் நிலையில், 'எரிபொருள் கடத்தலுக்காக' ஹார்முஸ் பகுதியில் மற்றொரு என்னை கப்பலை ஈரான் கைப்பற்றியுள்ளது.

பாரசீக வளைகுடாவில் உள்ள ஈரானின் கிரேட்டர் டன்ப் தீவுக்கு அருகே இஸ்லாமிய புரட்சிகர காவல்படையின் கடற்படையினர், 250,000 லிட்டர் டீசல் எரிபொருளுடன் சென்றுகொண்டிருந்த கப்பலை தடுத்து நிறுத்தியுள்ளனர்.

இந்த கப்பல் பந்தர் லெங்கிலிருந்து ஐக்கிய அரபு எமிரேட்ஸ் நோக்கி சென்றுகொண்டிருந்ததாக பிரிகேடியர் ஜெனரல் அலி ஓஸ்மாய் கூறியுள்ளார். மேலும், கப்பலில் இருந்த 11 ஊழியர்களும் கைது செய்யப்பட்டுள்ளனர்.

எரிபொருள் கடத்தல் என்று சந்தேகிக்கப்படும் ஒரு கப்பல் தடுத்து வைக்கப்பட்டு, அதன் 12 பிலிப்பைன்ஸ் குழு உறுப்பினர்கள் செப்டம்பர் 7 ஆம் திகதி ஹார்முஸ் ஜலசந்தியில் கைது செய்யப்பட்ட பின்னர், இந்த மாதத்தில் நடைபெறும் இரண்டாவது சம்பவம் இதுவாகும்.

தெஹ்ரானின் நீண்டகால பிராந்திய எதிரியான சவுதி அரேபியாவில் ஒரு பெரிய எண்ணெய் நிறுவனத்தின் மீது வார இறுதியில் நடந்த தாக்குதலைத் தொடர்ந்து, தற்போது நடந்துள்ள இந்த சம்பவம் சர்வதேச அளவில் பதட்டங்களை அதிகரித்துள்ளது.

Saturday, 14 September 2019

சவுதி அரேபியாவின் மிகப்பெரிய கச்சா எண்ணெய்  ஆலை மீது ஆளில்லா விமான தாக்குதல்

சவுதி அரேபியாவின் மிகப்பெரிய கச்சா எண்ணெய் ஆலை மீது ஆளில்லா விமான தாக்குதல்

சவுதி அரேபியாவின் மிகப்பெரிய கச்சா எண்ணெய் பதப்படுத்தும் ஆலை மீது ஆளில்லா விமான தாக்குதல் நடத்தப்பட்டு உள்ளது.

சவுதி அரேபிய அரசுக்கு சொந்தமான எண்ணெய் உற்பத்தி ஆலையான சவுதி அரம்கோ எண்ணெய் புக்கியாக் ஆலை மீது ஆளில்லா விமான தாக்குதல்கள் நடைபெற்று உள்ளன. இந்த தகவலை உள்துறை அமைச்சகம் தெரிவித்துள்ளது. இந்த தாக்குதலுக்கு யாரும் உடனடியாக பொறுப்பேற்கவில்லை.

புக்கியாக்கில் உள்ள சுத்திகரிப்பு ஆலை மற்றும் குரைஸ் எண்ணெய் வயலில் நடந்த தாக்குதலில் யாருக்கும் காயம் ஏற்பட்டதா என்பது குறித்து தெளிவாகத் தெரியவில்லை. சவுதி தலைநகர் ரியாத்தின் வடகிழக்கில் சுமார் 330 கிலோமீட்டர் (205 மைல்) தொலைவில் புக்கியாக் உள்ளது. புக்கியாக்கில் படமாக்கப்பட்ட ஆன்லைன் வீடியோக்களின் பின்னணியில் துப்பாக்கிச் சூடு ஒலி கேட்கிறது. 

சவுதி அரம்கோவின் அப்காய்க் எண்ணெய் பதப்படுத்தும் ஆலை உலகின் மிகப்பெரிய கச்சா எண்ணெய் பதப்படுத்தும் ஆலையாகும். இங்கு ஒரு நாளைக்கு 7 மில்லியன் பீப்பாய்கள் கச்சா எண்ணெய் பதப்படுத்த முடியும் என்று மதிப்பீடுகள் தெரிவிக்கின்றன.

இந்த ஆலை கடந்த காலங்களில் பயங்கரவாதிகளால் குறிவைக்கப்பட்டது. அல்கொய்தா தற்கொலை படையினர் பிப்ரவரி 2006-ல் எண்ணெய் வளாகத்தைத் தாக்க முயன்றனர், ஆனால் தோல்வியுற்றனர்.

Wednesday, 11 September 2019

கத்தார் எயார்வெய்ஸ் விமான டிக்கட்களுக்கான 30 வீதம் வரையிலான தள்ளுபடி அறிவிப்பு

கத்தார் எயார்வெய்ஸ் விமான டிக்கட்களுக்கான 30 வீதம் வரையிலான தள்ளுபடி அறிவிப்பு

கத்தாரின் முதன்மை விமானச் சேவை வழங்குனரான கத்தார் எயார்வெய்ஸ் 30 வீதம் வரைவிலான தள்ளுபடி விலையை அறிவித்துள்ளது. கத்தார் எயார்வெய்ஸ் யின் உத்தியோக பூர்வ இணையத்தளமான www.qatarairways.com ஊடாக புக்கிங்களை செய்யும் போது இந்த 30 சதவீத கழிவுகளைப் பெற்றுக்கொள்ள முடியும் என்பதாக அறிவிக்கப்பட்டுள்ளது. இந்த சலுகையைப் பெற்றுக் கொள்ள விரும்புபவர்கள், செப்டம்பர் மாதம் 15ம் திகதிக்கு முன்னால் டிக்கட்டுக்களை புக்கிங் செய்து கொள்ளும் படியும், பயணங்களை 2020ம் ஆண்டு ஆகஸ்ட் மாதம் 31ம் திகதிக்கு முன்னராக அமைத்துக் கொள்ளும்படியும் கேட்டுக் கொண்டுள்ளது.
இந்த தள்ளுபடி முடிவடைய 04 நாட்கள் மட்டுமே எஞ்சியிருக்கின்ற நிலையில் இந்த தள்ளுபடியைப் பயன்படுத்திக் கொள்ள விரும்புபவர்கள் கீழ்வரும் லிங்கிற்கு சென்று புக்கிங் செய்து கொள்ளுங்கள். மேலதிக விபரங்களையும் இந்த இணைப்பிற்கு செல்வதன் மூலம் அறிந்து கொள்ள முடியும்.
சவுதியில் இலங்கையருக்கான தொழில்வாய்ப்பை அதிகரிக்குக- கரு ஜயசூரிய

சவுதியில் இலங்கையருக்கான தொழில்வாய்ப்பை அதிகரிக்குக- கரு ஜயசூரிய

சவுதி அரேபியாவில் இலங்கையர்களுக்கு வழங்கப்படும் தொழில்வாய்ப்பை மேலும் விரிவுபடுத்துமாறு அந்நாட்டு சபாநாயகர் அப்துல்லா பின் மொஹம்மட் இப்ராஹீம் அல் ஷெயினிடம் இலங்கை சபாநாயகர் கரு ஜயசூரிய வேண்டுகோள் விடுத்துள்ளார்.

நேற்று (09) பாராளுமன்ற கட்டிடத் தொகுதியில் சபாயநாயகர் கரு ஜயசூரியவுக்கும் சவுதி சபாநாயகர் மற்றும் அவருடைய குழுவினருக்கும் இடையிலான சந்திப்பின்போதே இவ்விடயம் சுட்டிக்காட்டப்பட்டது.

2016ம் ஆண்டுடன் ஒப்பிடுகையில் சவுதி அரேபியாவில் பணியாற்றும் இலங்கையர்களின் எண்ணிக்கை சுமார் அறுபதாயிரமளவில் குறைவடைந்துள்ளது. பயிற்சி பெற்ற இலங்கையர்களை சவுதி அரோபியாவில் தொழில் நிமித்தம் அனுப்புவதற்கு இலங்கை அரசாங்கம் தயாராக உள்ளது. எனவே இலங்கையர்களுக்கான தொழில்வாய்ப்பை அதிகரிக்க நடவடிக்கை எடுக்கவேண்டும் என்று இச்சந்திப்பில் கரு ஜயசூரிய சவுதி சபாநாயகரிடம் வேண்டுகோள்விடுத்தார்.

மேலும், சவுதியில் பணியில் ஈடுபட்டிருக்கும் போது ஏதாவது ஒரு காரணத்தினால் உயிரிழக்கும் இலங்கையர் தொடர்பில் கவனம் செலுத்துமாறும் உயிரிழப்பிற்கான காரணம் தொடர்பில் விசாரணைகளை மேற்கொள்ளுமாறும் சபாநாயகர் கரு ஜயசூரிய சவுதி சபாநாயகரிடம் வேண்டுகோள் விடுத்தார்.
2020இற்கான ஐக்கிய அரபு இராச்சிய அரச விடுமுறைத் தினங்கள் அறிவிப்பு

2020இற்கான ஐக்கிய அரபு இராச்சிய அரச விடுமுறைத் தினங்கள் அறிவிப்பு

அடுத்த வருடத்திற்கான அரச விடுமுறைகள் தொடர்பான விபரங்களை டுபாய் இஸ்லாமிய விவகார, தொண்டு நடவடிக்கைகள் திணைக்களம் வௌியிட்டுள்ளது.

ஏற்கனவே இவ்வருடத்திற்கான 3 அரச விடுமுறை நாட்கள் உள்ள நிலையில் அடுத்த ஆண்டுக்கான அறிவிப்பு வௌியாகியுள்ளது.

இந்த வருடத்திற்கான அரச விடுமுறைத் தினங்கள்

முகம்மது நபி பிறந்த தினம் நவம்பர் – 30
தேசிய தினம் டிசம்பர் – 2-3

2020ம் ஆண்டுக்கான அரச விடுமுறைத் தினங்கள் (இஸ்லாமிய நாட்காட்டிக்கமைய)

புதுவருடம் ஜனவரி – 2
றமழான் ஏப்ரல் – 24
ஈதுல் பித்ர் மே – 23
அறபாத் தினம் ஜூலை – 30
ஈதுல் அதா ஜூலை – 31
ஹிஜ்ர் புதுவருடம்/ முகம்மது நபி பிறந்ததினம் நவம்பர் – 30
தேசிய தினம் டிசம்பர் – 2-3

(Thanks வேலைளத்தளம்)

Tuesday, 10 September 2019

விமானத்தில் மனைவி தூங்குவதற்காக, 6 மணி நேரம் நின்றபடி பயணம் செய்த கணவர்!

விமானத்தில் மனைவி தூங்குவதற்காக, 6 மணி நேரம் நின்றபடி பயணம் செய்த கணவர்!

விமானத்தில் பயணித்த மனைவி தூங்குவதற்காக, 6 மணி நேரம் நின்றபடி பயணம் செய்த கணவரின் புகைப்படம் சமூக வலைத்தளத்தில் வைரலானது.
கடந்த சில நாட்களுக்கு முன், கர்ட்னி லீ ஜான்சன் என்பவர் ட்விட்டரில் புகைப்படம் ஒன்றை பதிவிட்டார். அதில் விமானத்துக்குள் ஒருவர் நின்று கொண்டிருக்க, அருகில் பெண் ஒருவர் தூங்கிக் கொண்டிருக்கிறார். மனைவி நன்றாக தூங்க வேண்டும் என்பதற்காக இந்த மனிதர் 6 மணி நேரமாக நின்று கொண்டே வருகிறார். இதுதான் உண்மையான அன்பு என்று கேப்ஷன் கொடுத்திருந்தார் ஜான்சன். அது எந்த விமானம், எங்கிருந்து எங்கு சென்றது என்ற விவரம் ஏதுமில்லை.

இதையடுத்து மனைவி மீது அவர் வைத்திருந்த அன்பை பாராட்டி பலர் வாழ்த்துகளைத் தெரிவித்தனர். இந்தப் புகைப்படம் சுமார் 16 ஆயிரம் லைக்குகளையும் சுமார் 3500 ரீ ட்விட்டுகளையும் பெற்றது.

ஒரு பக்கம் கணவரின் அன்பை சிலர் பாராட்டினாலும் மறுபக்கம் அவர் மனைவி சுயநலம் கொண்டவர் என்று திட்டத் தொடங்கி விட்டனர் ட்விட்டர்வாசிகள். அதன் பின்னர் அன்பா!, சுயநலமா? என்ற விவாதம் அனல் பறக்கத் தொடங்கியது.
உலகில் நீண்டகாலம் ஆட்சி செய்த பெண் தலைவராக ஷேக் ஹசீனா: இந்திராகாந்தி, தாட்சரை முந்தினார்

உலகில் நீண்டகாலம் ஆட்சி செய்த பெண் தலைவராக ஷேக் ஹசீனா: இந்திராகாந்தி, தாட்சரை முந்தினார்

உலகில் நீண்டகாலம் ஆட்சி செய்த பெண் தலைவர் என்ற சாதனையை ஷேக் ஹசீனா படைத்தார்.

நீண்டகாலம் நாட்டை ஆட்சி செய்த உலகின் பிரபல பெண் தலைவர்கள் பற்றி ‘விக்கிலீக்ஸ்’ ஆய்வு மேற்கொண்டது. இதில் இந்திரா காந்தி, மார்கரெட் தாட்சர், சந்திரிகா குமாரதுங்கா ஆகியோரை முந்தி வங்காளதேச பிரதமர் ஷேக் ஹசீனா சாதனை படைத்துள்ளார்.

ஜெர்மனி பிரதமர் ஏஞ்செலா மெர்கெல் 2005-ம் ஆண்டு நவம்பர் 22-ந் தேதி ஆட்சிக்கு வந்ததில் இருந்து இன்னும் பதவியில் நீடிக்கிறார். இங்கிலாந்து பிரதமர் மார்கரெட் தாட்சர் 11 ஆண்டுகள் 208 நாட்கள் ஆட்சியில் இருந்தார். இந்திரா காந்தி பல்வேறு காலகட்டங்களில் மொத்தம் 15 வருடங்கள் இந்தியாவை ஆட்சி செய்தார். சந்திரிகா குமாரதுங்கா இலங்கையின் ஜனாதிபதி மற்றும் பிரதமர் ஆகிய பதவிகளில் 11 வருடங்கள் 7 நாட்கள் இருந்துள்ளார்.

ஷேக் ஹசீனா முதல் முறையாக 1996-2001 வரை வங்காளதேச பிரதமராக இருந்தார். பின்னர் 2008-ம் ஆண்டு ஆட்சிக்கு வந்த அவர் தொடர்ந்து 3-வது முறையாக வெற்றிபெற்று, இந்த ஆண்டு ஜனவரி மாதம் பிரதமராக பதவி ஏற்றார். ஏற்கனவே 15 ஆண்டுகள் பதவியில் இருந்த அவர், இப்போது 4-வது ஆட்சியில் ஒரு ஆண்டை நெருங்கி, 16-வது ஆண்டில் உள்ளார்.

செயின்ட் லூசியாவை கவர்னர் ஜெனரல் பியர்லெட் லூசி 20 ஆண்டுகள் 105 நாட்கள் ஆட்சி செய்து முதலிடத்தில் இருந்தாலும் அவர் உலகின் பிரபல தலைவராக இல்லை. ஐஸ்லாந்து தலைவர் விக்டிஸ் பின்போகாடோத்திர் (16 ஆண்டுகள்), டோமினிகா பிரதமர் உசெனின் (14 ஆண்டுகள் 328 நாட்கள்), அயர்லாந்து ஜனாதிபதி மேரி மெகாலீஸ் (14 ஆண்டுகள்) ஆகியோரும் பிரபல தலைவர்கள் பட்டியலில் இல்லை.
3-வது மனைவி தேடிய கணவரை ரோட்டில் வைத்து அடித்து உதைத்த முதல் 2 மனைவிகள்

3-வது மனைவி தேடிய கணவரை ரோட்டில் வைத்து அடித்து உதைத்த முதல் 2 மனைவிகள்

கோவை சூலுரில் 3-வது மனைவி தேடிய கணவரை முதல் 2 மனைவிகள் ரோட்டில் வைத்து அடித்து உதைத்து உள்ளனர்.

கோவை சூலூர் அருகே உள்ள நேரு நகரை சேர்ந்தவர் சவுந்தர்ராஜ். இவரது மகன் அரங்க அரவிந்த தினேஷ் ( வயது 26). இவர் ராசிபாளையத்தில் உள்ள தனியார் நிறுவனத்தில் ஊழியராக பணியாற்றி வருகிறார்.

கடந்த 2016- ம் ஆண்டு இவருக்கும், திருப்பூர் கணபதி பாளையத்தை சேர்ந்த ராஜசேகர் என்பவரது மகள் பிரியதர்ஷினி என்பவருக்கும் திருமணம் நடந்தது. திருமணமான 15 நாட்களிலேயே அரவிந்த் ,பிரியதர்ஷினியை அடித்து, உதைத்து கொடுமைப்படுத்தினார். கொடுமை தாங்கமுடியாத அவர் தனது மாமனார், மாமியாரிடம் நடக்கும் சம்பவங்களை கூறினார். இதனை அவர்கள் கண்டுகொள்ளவில்லை.

இதனையடுத்து பிரியதர்ஷினி இது குறித்து பேரூர் அனைத்து மகளிர் போலீசில் புகார் செய்தார்.பின்னர் திருப்பூரில் உள்ள தனது தாய் வீட்டில் வசித்து வந்தார்.

மனைவி பிரிந்து சென்றதும் தனக்கு திருமணமானதை மறைத்து அரங்க அரவிந்த் திருமண வலைதளத்தில் திருமண தகவல் நிலையம் மூலம் மீண்டும் தனக்கு பெண் தேடினார்.

அப்போது திருமண தகவல் மையம் மூலமாக கரூர் மாவட்டம் பசுபதி பாளையத்தை சேர்ந்த அய்யப்பன் என்பவரது மகள் அனுப்பிரியா (23) என்ற பெண்ணை தனது முதல் மனைவிக்கு தெரியாமல் கடந்த ஏப்ரல் 10-ம் தேதி 2-வதாக திருமணம் செய்தார்.

அனுப்பிரியாவுக்கு ஏற்கனவே திருமணமாகி 2 வயதில் ஒரு ஆண் குழந்தை உள்ளது. அரங்க அரவிந்த் அனுப்பிரியாவை ஒண்டிப்புதூரில் வீடு வாடகைக்கு எடுத்து கொடுத்து வசித்து வந்தார்.

சில மாதங்கள் கடந்ததும் அரங்க அரவிந்த் முதல் மனைவியை கொடுமை படுத்தியது போல அனுப்பிரியாவையும் கொடுமைபடுத்தி உள்ளார்.

இதனால் மனவேதனை அடைந்த அனுப்பிரியா தனது கணவரை பிரிந்து கரூரில் உள்ள தனது தாயார் வீட்டிற்கு சென்று விட்டார். 2-வது மனைவியும் பிரிந்து சென்றதால் அரங்க அரவிந்த் மீண்டும் 3-வதாக திருமணம் செய்வதற்காக திருமண வலைத்தளத்தில் தனக்கு மணப்பெண் தேடினார். இதனை தெரிந்து கொண்ட 2 மனைவிகளின் குடும்பத்தினர் அரவிந்திடம் நேரில் சென்று கேட்டுள்ளனர். அதற்கு அவர் நான் அப்படித்தான் செய்வேன். உங்களால் முடிந்ததை பார்த்து கொள்ளுங்கள் என்று கூறி உள்ளார்.

இதனையடுத்து முதல் மனைவி பிரியதர்ஷினி 2-வது மனைவி அனுப்பிரியா ஆகியோர் அரவிந்த் வேலை பார்த்து வரும் தொழிற்சாலைக்கு சென்று அவரை வெளியே அனுப்பும்படி கூறினர்.

ஆனால் கம்பெனி நிர்வாகம் அவரை வெளியே அனுப்ப மறுத்து விட்டது. அதனையடுத்து 2 மனைவிகளும் கம்பெனி முன்பு அமர்ந்து தர்ணா போராட்டத்தில் ஈடுபட்டனர். இதனால் அங்கு பரபரப்பு ஏற்பட்டது. இதனையடுத்து சூலூர் போலீசார் சம்பவ இடத்துக்கு விரைந்து சென்று அரங்க அரவிந்தையும், அவரது 2 மனைவிகளையும் போலீஸ் நிலையத்துக்கு வரும்படி கூறினர்.

போலீஸ் நிலையத்துக்கு செல்வதற்காக அரங்க அரவிந்த் கம்பெனியில் இருந்து வெளியே வந்தார். இதனை பார்த்த அவரது 2 மனைவிகளும், அவர்களது குடும்பத்தினரும் சேர்ந்து சரமாரியாக தாக்கினர். இதனால் அங்கு பரபரப்பு ஏற்பட்டது. இதனையடுத்து 2 மனைவிகளிடம் இருந்து அரங்க அரவிந்தை போலீசார் மீட்டு போலீஸ் நிலையத்துக்கு அழைத்து சென்றனர்.

பின்னர் அரங்க அரவிந்த் மீது அவரது 2- மனைவிகளும் தங்களை ஏமாற்றி திருமணம் செய்து விட்டு, 3-வதாக திருமணம் செய்ய முயன்றதால் அவர் மீது உரிய நடவடிக்கை எடுக்க வேண்டும் என புகார் அளித்தனர். புகாரின் பேரில் போலீசார் விசாரணை நடத்தி வருகிறார்கள்.

2 மனைவிகளும் சேர்ந்து 3-வதாக பெண்ணை திருமணம் செய்ய முயன்ற கணவரை தாக்கிய சம்பவம் கோவையில் பரபரப்பை ஏற்படுத்தி உள்ளது.
கிழக்கு மாகாண ஆணையாளராக றிஸ்வானி றிபாஸ் அவர்கள் பதவி உயர்வு

கிழக்கு மாகாண ஆணையாளராக றிஸ்வானி றிபாஸ் அவர்கள் பதவி உயர்வு

அம்பாரை மாவட்ட கிராமிய கைத்தொழில் திணைக்களத்தின் உதவிப் பணிப்பாளராக (Assistant Director of Rural Industrial Department - Ampara District -EP) ஆறு வருட காலமாக கடமையாற்றி வந்த இறக்காமத்தைச் சேர்ந்த திருமதி றிஸ்வானி றிபாஸ் (இலங்கை நிருவாக சேவை - SLAS) அவர்கள்
09.09.2019 ஆம் திகதி முதல் கிழக்கு மாகாண சிறுவர் நன்னடத்தைத் திணைக்களத்தின்  மாகாண ஆணையாளராக  (Provincial Commissioner of Department of Probation and Child Care) பதவி உயர்வு பெற்று கடமையை பொறுப்பேற்றுள்ளார்.
கத்தாரில் மிகப் பெரிய அவசர சிகிச்சைப் பிரிவு அதிபர் தமீம் அவர்களால் திறந்து வைப்பு!

கத்தாரில் மிகப் பெரிய அவசர சிகிச்சைப் பிரிவு அதிபர் தமீம் அவர்களால் திறந்து வைப்பு!

கத்தாரின் ஹமத் வைத்தியசாலையில் அமைக்கப்பட்டு வந்த மாபெரும் அவசர சிகிச்சைப் பிரிவு கத்தார் அதிபர் தமீம் அல் ஹமத் அவர்களினால் நேற்றைய தினம் (09-09-2019) அங்குரார்ப்பணம் செய்து வைக்கப்பட்டது. 

அத்துடன் ஹமத் வைத்திய சாலையில் நிர்மாணிக்கப்பட்டு வந்த பல்வேறு நவீன மருத்துவ கட்டடிடங்களும் திறந்து வைக்கப்பட்டுள்ளதாக ஹமத் வைத்திய சாலை செய்திகள் தெரிவிக்கின்றன.
ஜப்பானில் தொழில்வாய்ப்பு – வேலைவாய்ப்பு பணியகத்தின் எச்சரிக்கைச் செய்தி!

ஜப்பானில் தொழில்வாய்ப்பு – வேலைவாய்ப்பு பணியகத்தின் எச்சரிக்கைச் செய்தி!

இலங்கை அரசாங்கம் ஜப்பான் அரசாங்கத்துடன் மேற்கொண்டுள்ள புரிந்துணர்வு உடன்படிக்கையின் கீழ் இலங்கையர்களுக்கு ஜப்பானில் தொழில் வாய்ப்பை வழங்கும் வேலைத்திட்டம் இலங்கை வேலைவாய்ப்பு பணியகத்தினால் ஆரம்பிக்கப்பட்டுள்ளது.

முக்கிய இரண்டு பிரிவுகள் மூலம் தொழில் வாய்ப்புக்கள் இலங்கையர்களுக்கு கிடைப்பதாக இலங்கை வெளிநாட்டு வேலைவாய்ப்பு பணியகம் தெரிவித்துள்ளது.

01. தோழில்நுட்ப சேவை பயிற்சியுடனான தெழில்வாய்ப்பிற்கான உடன்படிக்கை NEW TITP
02. விஷேட செயலாற்றலை கொண்டவர்களுக்காக தெழில்வாய்ப்பிற்கான உடன்டபடிக்கை SSWRP

NEW TITP
தோழில்நுட்ப சேவை பயிற்சியுடன் தொழிலில் ஈடுபடுவதற்கான உடன்படிக்கையின் கீழ் இலங்கை வெளிநாட்டு வேலைவாய்ப்பு பணியகத்தின் மூலம் அல்லது பணியகத்தின் அனுமதியுடன் தனியார் தொழில்வாய்ப்பு முகவர் நிலையத்தின் மூலம் இதில் ஈடுபடமுடியம்.

பணியகத்தின் மூலம் IM ஜப்பான் நிறுவனத்தில் இணைத்துக்கொள்ளல் இலவசமாக மேற்கொள்ளப்படும். அத்தோடு தெரிவுசெய்யப்பட்ட இளைஞர் யுவதிகளுக்கு தமது தனிப்பட்ட செலவிற்காக சில தொகையை செலவிட வேண்டியிருக்கும். இந்த தொழிலுக்காக விண்ணப்பிக்கும் பணியாளர்களுக்கு ஜப்பான் மொழி ஆற்றல் தொடர்பில் தகுதியிருக்க வேண்டும்.(N5/N4)

பணியகத்தின் அனுமதி பெற்ற தனியார் தொழில்வாய்ப்பு முகவர் நிறுவனம் மேற்கொள்ளும் ஆட்களை இணைத்துக்கொள்வதில் தகுதிகளை கொண்ட தெரிவு செய்யப்பட்ட விண்ணப்பதாரர்களிடம் கட்டணம் அறிவிடமுடியும். இவ்வாறு அறவிடப்படும் கட்டணம் 350,000.00 இற்கும் குறைந்ததாக இருக்க வேண்டும். இவ்வாறு அங்கீகரிக்கப்படும் கட்டணம் பணியகத்தின் இணையத்தளத்தின் மூலம் அவதானிக்க முடியும்.

ஜப்பான் தொழில் வாய்ப்பிற்காக இது வரையில் அனுமதிப்பத்திரம் பெற்ற தொழில் முகவர் நிலையங்களுக்காக ஜப்பானில் OTIT என்ற அனுமதி வழங்கப்பட்டுள்ளது. இந்த அனுமதியைப் பெற்ற தொழில்முகவர் பட்டியல் www.slbfe.lk என்ற இணையத்தளத்தின் மூலம் பார்வை இடமுடியம்.

SSWRP

விஷேட ஆற்றல்களைக் கொண்டவர்களுக்காக உடன்படிக்கைக்கு அமைவாக ஜப்பானில் அறிமுகப்படுத்தப்பட்டுள்ள விஷேட ஆற்றல்களைக் கொண்ட பணியாளர்களுக்க ஜப்பானிற்கு தொழில்வாய்ப்பிற்கு செல்வதற்கு சந்தர்ப்பம் வழங்கப்படும்.

இந்த உடன்படிக்கைக்கு அமைவாக 14 துறைகளின் கீழ் தொழில் வாய்ப்புக்களை பெற்றுக்கொள்ள முடியும். பராமரிப்பு சேவை, கட்டிடங்களை துப்பரவு செய்வோர் (SSWRP), இயந்திர உதிரிப் பாகங்கள் மற்றும் ஒன்றிணைத்தல் மற்றும் தொழில்நுட்ப இயந்திர தொழில்துறை, இலத்திரனியல் மற்றும் தகவல் தொழிற்துறை, கட்டிட நிர்மாணத்தை கேந்திரமாக கொண்ட கப்பல் துறை ,கப்பல் தொழில்துறை, போக்குவரத்து வாகனங்கள் மற்றும் பராமரிப்பு, விமான தொழிற்துறை, தங்குமிடவசதி, விவசாய தொழில்துறை, கடற்றொழில் மற்றும் நீர்வாழ் உற்பத்தி, உணவு பானங்கள் தயாரிப்பு, உணவு சேவை உள்ளிட்ட 16 துறைகளை உள்ளடக்கியுள்ளது.

இந்த SSWRP வேலைத்திட்டத்திற்காக எந்தவொரு தேசிய தொழில் முகவர் நிலையத்திற்கும் ஆட்களை இணைத்துக்கொள்வதற்காக வெளிநாட்டு வேலைவாய்ப்பு பணியகத்தினால் அனுமதி வழங்கப்படவில்லை. இந்த வேலைத்திட்டத்தின் மூலம் ஜப்பான் தொழில்வாய்ப்பிற்காக செல்வதற்கு தகுதியைக் கொண்டவர்கள் பணியகத்தின் இணையத்தளத்தில் வெளியிடப்பட்டுள்ள விண்ணப்பத்தை பூர்த்தி செய்து பணியகத்திற்கு அனுப்பி வைக்க வேண்டும்.

இவ்வாறு அனுப்பி வைக்கப்பட்ட பின்னர் தகுதிகளைக் கொண்ட விண்ணப்பதாரர்களுக்கு இலங்கையில் நடத்தப்படும் விஷேட ஆற்றல்களை பரிசோதிப்பதற்கு செயலகம் நடவடிக்கை மேற்கொள்ளும். இது தொடர்பான தவறான கருத்துக்களை வெளியிட்டு நபர்களை தவறாக வழிநடத்தும் மோசடி நபர்கள் மற்றும் நிறுவனங்கள் ஜப்பான் தொழில் வாய்ப்பிற்காக இவர்களுக்கு பணியாளர்களை அனுப்புவதற்கு முடியும் என்றும் அரசாங்கத்துடன் தொடர்புபட்டிருப்பதாக தெரிவித்து பணத்தை வசூலிப்பதாக சம்பவங்கள் அலுவலகத்திற்கு கிடைத்துள்ளன.

இதனால் ஜப்பான் தொழில் வாய்ப்பிற்காக பணம் வசூலிக்கும் நபர்களிடம் சிக்க வேண்டாம் என்றும் அவ்வான நபர்கள் தொடர்பான தகவல்கள் இருக்குமாயின் அது தொடர்பான தகவல்களை வழங்குமாறு பணியகம் பொது மக்களிடம் கேட்டுக்கொண்டுள்ளது.

ஜப்பான் தொழில் வாய்ப்பு தொடர்பாக சகல தகவல்களும் www.slbfe.lk என்ற இணையத்தளத்தின் மூலம் அறிந்து கொள்ளமுடியும்.

Monday, 9 September 2019

உம்ராவுக்கான புதிய நடைமுறைகளை அறிமுகப்படுத்தியது சவுதி அரசு ..

உம்ராவுக்கான புதிய நடைமுறைகளை அறிமுகப்படுத்தியது சவுதி அரசு ..

ஹிஜ்ரி 1441 ஆம் ஆண்டுக்கான முதலாவது உம்ரா விசா சற்று நேரத்தின் முன்னர் வெளியாகியுள்ளது. 2019ஆம் ஆண்டு ஹஜ் இற்கு பின்னர் இலங்கைக்கான முதலாவது உம்ரா விசா தற்போது வெளியிடப்பட்டுள்ளது.

கடந்த வருடங்களைப் போல் அல்லாது உம்ராவுக்கு சவுதி அரேபிய அரசாங்கம் இவ்வருடம் பல புதிய சட்டதிட்டங்களை நடைமுறைக்குக் கொண்டுவந்துள்ளது.

இது தொடர்பில் கருத்து வெளியிட்ட காத்தன்குடி - அஷ்ஷெய்க் மஷூத் அஹமத் ஹாஷிமி

“கடந்த வருடங்களைப் போல் அல்லாது சவுதி அரேபிய அரசாங்கம் இவ்வருடம் பல புதிய சட்டதிட்டங்களை நடைமுறைக்குக் கொண்டுவந்துள்ளது.

அதில் ஒன்று தான் சவூதி அரசினால் அங்கீகரிக்கப்பட்ட முழுமையான லைசென்ஸ் பெறப்பட்ட ஹோட்டல்களில் தான் ஹாஜிமார்கள் தங்க வைக்கப்படவேண்டும்.

அவைகள் நட்சத்திர தரத்திலான ஒட்டல்களாக இருக்க வேண்டும். குறித்த ஹோட்டல்களின் விலைகள் ஒப்பீட்டளவில் கொஞ்சம் அதிகமாக காணப்படுகிறது.

சாதாரணமான நட்சத்திர ஓட்டல்கள் ஹரத்தில் இருந்து 850 மீட்டர்கள் அல்லது 1 கிலோமீட்டர் தூரத்தில் அந்த ஹோட்டல் அமையப்பெற்றுள்ளதால் அந்த ஹோட்டல்களில் இருந்து ஹரத்துக்கு பஸ் வண்டிகளில் தான் வரவேண்டும் என்பதால் மேலதிக பஸ் கட்டணங்களும் செலுத்த வேண்டிய நிலை ஏற்படும்.

ஹரத்திற்கு அருகாமையில் உள்ள ஹோட்டல்களில் பெரும்பான்மையானவைகளுக்கு அனுமதி லைசென்ஸ் வழங்கப்படாததன் காரணமாக சற்று தொலைவில் உள்ள ஹோட்டல்களை பதிவு செய்ய வேண்டிய நிலைமயும் ஏற்பட்டுள்ளது.

அத்துடன் விசாவுடைய கட்டணமும் உயர்த்தப்பட்டுள்ள அதேவேளை.சிறுவர்களும் முழு ஹாஜியாகவே கணிக்கப்பட உள்ளனர்.

அதேபோல போக்குவருத்திற்காக சவுதி அரேபிய அரசாங்கத்தினால் அங்கீகரிக்கப்பட்ட நிறுவனத்திலிருந்து மாத்திரமே பெறவேண்டும் என்ற நடைமுறை சவுதி அரசினால் ஏற்படுத்தப்பட்டுள்ளது.

இதனால் இந்த 1441 வரக்கூடிய இந்த முஹர்ரம் மாதத்திலிருந்து செல்லக்கூடிய உம்ரா பயணிகள் முன்னரை விட பெரும் தொகையை கொடுக்க வேண்டிய ஒரு நிலைமை தோற்றம் பெற்றுள்ளது.

இதற்கு முன்னர் குறைந்த கட்டணமாக 95000 ரூபாய், ஒரு லட்சம் ரூபாய், ஒரு லட்சத்தி பத்தாயிரம் ரூபாய் என்ற அடிப்படையில் பெற்ற பல நிறுவனங்கள் எதிர்வரும் காலங்களில் இந்த குறைந்த கட்டணங்களில் செய்வதன் மூலமாக பல நஷ்டங்களையும் பல கஷ்டங்களையும் பல நெருக்கடிகளையும் அவர்கள் எதிர்கொள்ள வேண்டிய நிலையில் உள்ளனர்.

இனிவரும் காலங்களில் சவுதி அரேபியா அரசாங்கத்தினுடைய இந்த விதிமுறைகளின் படி உம்ராவுடைய கட்டணங்கள் கூடுதலான கட்டணங்களாக அமையப்போகின்றது.

இலங்கையில் பதிவு செய்யப்பட்ட சில உம்ரா நிறுவனங்கள் எதிர்வரும் 11 ஆம் திகதி 12 ஆம் திகதிகளில் முதலாவது குழுக்களை அழைத்துக்கொண்டு மக்கா புறப்படுகிறார்கள். அவர்களும் கூடுதலான கட்டணங்கள் செலுத்தியே குழுக்களாக செல்ல வேண்டிய நிர்ப்பந்தத்தில் இருக்கிறார்கள்.

எது எவ்வாறாயினும் எதிர்வரும் காலங்களில் உம்ரா உடைய கட்டணங்கள் அதிகரிக்கப்படும் நிலை தோன்றியுள்ளது.

எவ்வாறு ஹஜ்ஜுக்கு ஹாஜிகள் செல்கிறார்களோ அதே போல உம்ராவின் விதிமுறைகளும் மாற்றப்பட்டு வருகின்றது என்ற செய்தி அனைவரும் தெரிந்து கொள்ளவேண்டிய ஒரு முக்கியமான விடயமாகமாகும் என அஷ்ஷெய்க் மஷூத் அஹமத் ஹாஷிமி குறிப்பிட்டார்.

Sunday, 8 September 2019

சுதந்திரக் கட்சி இறுதி நேரத்தில், அதிரடியான முடிவை எடுக்கும் - சந்திரிகா

சுதந்திரக் கட்சி இறுதி நேரத்தில், அதிரடியான முடிவை எடுக்கும் - சந்திரிகா

2015ஆம் ஆண்டு ஜனாதிபதித் தேர்தலில் இறுதி நேரத்தில் பொதுவேட்பாளர் அறிவிக்கப்பட்டதைப் போன்று, இந்த வருடம் ஜனாதிபதித் தேர்தலிலும் இறுதி நேரத்தில் ஸ்ரீலங்கா சுதந்திரக் கட்சி அதிரடி காட்டும் என முன்னாள் ஜனாதிபதி சந்திரிகா பண்டாரநாயக்க குமாரதுங்க தெரிவித்தார்.

சர்வதேச செய்தி நிறுவனத்தின் கொழும்புச் செய்தியாளருக்கு வழங்கிய பிரத்தியேக நேர்காணலிலேயே அவர் இந்த விடயத்தை வெளிப்படுத்தியுள்ளார்.

அவர் மேலும் தெரிவித்ததாவது,

ஸ்ரீலங்கா சுதந்திரக் கட்சியின் மாநாட்டில் நான் பங்கேற்றிருந்தேன். அந்தக் கட்சி எனது தாய் வீடு. அந்தக் கட்சியிலுள்ள களைகளை அகற்றவேண்டும். அந்தக் கட்சிக்கு விசுவாசமானவர்களுடன் தொடர்ந்தும் இருப்பேன்.

ஸ்ரீலங்கா சுதந்திரக் கட்சி எதிர்வரும் ஜனாதிபதித் தேர்தல் தொடர்பில் இப்போது முடிவை வெளியிடாது. 2015ஆம் ஆண்டு ஜனாதிபதித் தேர்தலில் இறுதி நேரத்தில் இடம்பெற்றதைப் போன்று அதிரடியான முடிவை எடுக்கும் என குறிப்பிட்டுள்ளார்.